नवी दिल्ली: अमेरिकेचे राष्ट्राध्यक्ष डोनाल्ड ट्रम्प यांनी बुधवारी ग्रीनलँड मिळवण्यासाठी बळाचा वापर करण्याची शक्यता फेटाळून लावली, आणि वाटाघाटींद्वारे तो मिळवण्यास आपली पसंती असल्याचे जाहीर केले. त्याच वेळी, जर युरोपने या कराराला नकार दिला, तर अमेरिका ते लक्षात ठेवेल, असा इशाराही त्यांनी दिला. दावोस येथील जागतिक आर्थिक मंचामध्ये (डब्ल्यूईएफ) दिलेल्या 70 मिनिटांच्या भाषणात, ट्रम्प यांनी पुन्हा एकदा ग्रीनलँडच्या मागणीचा पुनरुच्चार केला. डेन्मार्क राज्याचा एक स्वायत्त प्रदेश असलेल्या या बेटाचे वर्णन त्यांनी ‘जागतिक संरक्षणासाठी आवश्यक असलेला तुकडा’ असे केले. या भाषणादरम्यान अमेरिकेच्या राष्ट्राध्यक्षांनी ग्रीनलँडचा उल्लेख किमान चार वेळा ‘आईसलँड’ असा केला.
“जोपर्यंत मी प्रचंड शक्ती आणि बळाचा वापर करण्याचा निर्णय घेत नाही, तोपर्यंत आम्हाला कदाचित काहीही मिळणार नाही, जिथे आम्ही, खरे सांगायचे तर, अजिंक्य असू,” असे ट्रम्प म्हणाले. “मी तसे करणार नाही… हे कदाचित मी केलेले सर्वात मोठे विधान आहे, कारण लोकांना वाटले होते की मी बळाचा वापर करेन. मला बळाचा वापर करण्याची गरज नाही. मला बळाचा वापर करायचा नाही. मी बळाचा वापर करणार नाही. युनायटेड स्टेट्स फक्त ग्रीनलँड नावाच्या जागेची मागणी करत आहे. जिथे आमच्याकडे विश्वस्त म्हणून ताबा होता, पण दुसऱ्या महायुद्धात आम्ही जर्मन, जपानी, इटालियन आणि इतरांना पराभूत केल्यानंतर, आम्ही आदराने तो डेन्मार्कला परत केला. ट्रम्प यांनी उत्तर अटलांटिक करार संघटनेवर (NATO) निशाणा साधला. अमेरिका, कॅनडा आणि अनेक युरोपीय राष्ट्रांचा समावेश असलेल्या या लष्करी आघाडीचे संरक्षण करण्यासाठी अमेरिकेने 100 टक्के खर्च केला, पण त्याबदल्यात काहीही मिळाले नाही, असा दावा त्यांनी केला.
ट्रम्प यांच्या मते, सध्या ग्रीनलँडचे संरक्षण करणे शक्य नाही, कारण अमेरिकेकडे फक्त ‘भाडेपट्ट्याचा करार’ आहे. “राष्ट्रीय आणि आंतरराष्ट्रीय सुरक्षेसाठी आणि आमच्या अत्यंत उत्साही व संभाव्य धोकादायक शत्रूंना दूर ठेवण्यासाठी, आम्हाला डेन्मार्ककडून फक्त ही जमिनीचा तुकडा हवा आहे, जिथे आम्ही आतापर्यंतचा सर्वात भव्य सुवर्णघुमट बांधू शकू.” असे ते म्हणाले. ट्रम्प यांच्या ग्रीनलँडवरील रोखामुळे त्यांचे युरोपीय मित्र राष्ट्रांशी मतभेद समोर आले आहेत. या आठवड्याच्या सुरुवातीला, त्यांनी ग्रीनलँडच्या विक्रीसाठी दबाव आणण्याकरिता युरोपियन युनियनच्या सहा सदस्यांसह 10 युरोपीय राष्ट्रांवर 10 टक्के शुल्क लावण्याची घोषणा केली. जर कोणताही करार झाला नाही, तर जूनपर्यंत हे शुल्क 25 टक्क्यांपर्यंत वाढेल. रॉयटर्सने दिलेल्या वृत्तानुसार, युरोपियन संसदेने बुधवारी ग्रीनलँडच्या मुद्द्यावरून, गेल्या वर्षी अमेरिकेशी झालेल्या व्यापार करारावरील काम थांबवले. ट्रम्प यांनी दावा केला की, जर ग्रीनलँडवर अमेरिकेला सार्वभौमत्व दिले गेले, तर अमेरिका खूप ‘कृतज्ञ’ राहील, अन्यथा तो देश ‘हे लक्षात ठेवेल’.
अमेरिकेच्या राष्ट्राध्यक्षांनी युरोपवर टीका केली, आणि खंडात होत असलेल्या कथित मोठ्या प्रमाणावरील स्थलांतराकडे लक्ष वेधले, ज्यामुळे अनेक शहरे ‘ओळखण्यासारखी राहिलेली नाहीत’. तसेच, अशा धोरणांसाठी वॉशिंग्टन आणि ब्रुसेल्समधील पारंपरिक विचारसरणीवरही त्यांनी टीका केली. त्यांनी कॅनडाचे पंतप्रधान मार्क कार्नी यांच्यावरही निशाणा साधला, ज्यांनी मंगळवारी सध्याच्या अमेरिकन प्रशासनाखालील भू-राजकीय बदलांमुळे जग ‘विभाजना’च्या दिशेने जात असल्याचे म्हटले होते. “कॅनडाला अमेरिकेकडून अनेक गोष्टी फुकटात मिळतात आणि त्यांनी कृतज्ञ राहिले पाहिजे. त्यांच्या (कार्नी यांच्या) भाषणातून ते फारसे कृतज्ञ नसल्याचे दिसले. कॅनडा अमेरिकेमुळेच अस्तित्वात आहे, हे लक्षात ठेवा, मार्क, पुढच्या वेळी तुम्ही विधान कराल तेव्हा,” असे ट्रम्प म्हणाले. ट्रम्प आंतरराष्ट्रीय नेते आणि व्यावसायिकांच्या मेळाव्याला 45 मिनिटे संबोधित करणार होते, परंतु त्यांनी जवळपास 70 मिनिटे भाषण केले आणि नंतर काही प्रश्नांची उत्तरे दिली.
बुधवारची दावोस भेट, ट्रम्प यांचे अर्ध्या दशकाहून अधिक काळानंतर या मंचावर पुनरागमन दर्शवते. त्यांच्या भाषणात त्यांनी त्यांचे पूर्ववर्ती जोसेफ बायडेन, अमेरिकेचे वाढते कर्ज, परवडणारी क्षमता, तसेच अमेरिकेतील सोमाली स्थलांतरितांवरही भाष्य केले.
Recent Comments