बेलेम (ब्राझील): पर्यावरण मंत्री भूपेंद्र यादव यांच्या नेतृत्वाखालील भारतीय शिष्टमंडळाने बुधवारी कॉप 30 स्थळी चीन आणि इंडोनेशियासह समविचारी विकसनशील देशांच्या बंद दाराआड झालेल्या बैठकीत ब्राझीलचे अध्यक्ष लुईझ इनासियो लुला दा सिल्वा यांची भेट घेतली. ब्राझीलच्या बाजूच्या एका सूत्राने ‘द प्रिंट’ला सांगितले, की अध्यक्ष लुला यांनी जीवाश्म इंधनाच्या रोडमॅपबद्दल चर्चा केली. शिखर परिषदेच्या अजेंडाचा भाग नसतानाही जीवाश्म इंधनावर रोडमॅपची मागणी करताना लुला यांनी 10 नोव्हेंबर रोजी त्यांच्या कॉप 30 उद्घाटन भाषणात एक मोठे विधान केले होते. तेव्हापासून, ब्राझीलच्या अध्यक्षांनी दोन वेगवेगळ्या प्रसंगी जीवाश्म इंधनाचा उल्लेख केला आहे.
यादव आणि लुला यांच्यातील चर्चेदरम्यान हा विषय उपस्थित झाला, जरी त्याचे तपशील अजून उघड झालेले नाहीत. भारताचे प्रमुख वाटाघाटीकार अमनदीप गर्ग बैठकीत उपस्थित होते. ग्लासगो येथे झालेल्या कॉप 26 मध्ये, भारत आणि चीन एकत्रितपणे अंतिम मजकुरात महत्त्वाचा बदल घडवून आणू शकले. दोन वर्षांनंतर, दुबई येथे झालेल्या कॉप 28 मध्ये, भारताने “जीवाश्म इंधनापासून दूर जाण्याचे” आवाहन करणाऱ्या अंतिम मजकुराच्या वाक्यांशाला सहमती दर्शवली, जरी देशाने त्याच्या विकासाच्या गरजा आणि हवामान न्यायाचे महत्त्व अधोरेखित केले, असा युक्तिवाद केला, की श्रीमंत राष्ट्रांनी उत्सर्जन कपातीत पुढाकार घेतला पाहिजे. मंगळवारी आफ्रिका, युरोप, लॅटिन अमेरिका आणि पॅसिफिक बेटांमधील 82 देशांनी कॉप 30 च्या अंतिम मजकुरात जीवाश्म इंधन टप्प्याटप्प्याने बंद करण्याचा समावेश करण्यास सहमती दर्शविली, जो स्थानिक वेळेनुसार रात्री 9 वाजता शिखर परिषदेच्या समाप्तीपूर्वी प्रसिद्ध होण्याची अपेक्षा आहे.
आदल्या दिवशी, यादव यांनी त्यांच्या ब्राझिलियन समकक्ष मरीना सिल्वा यांची भेट घेतली आणि कॉप 30 मधील महत्त्वाच्या उद्दिष्टांवर चर्चा केली. यादव यांनी चीनचे हवामान बदलासाठीचे विशेष दूत लिऊ झेनमिन यांचीही भेट घेतली, जिथे त्यांनी समान विचारसरणीच्या विकसनशील देशांमधील (एलएमडीसी) समन्वयाशी संबंधित बाबींवर चर्चा केली, “विशेषतः पॅरिस कराराची अखंडता राखण्यावर लक्ष केंद्रित करून.” “आज जग चालवणाऱ्या नेत्यांनी हे समजून घेतले पाहिजे, की जर आपण लोकांच्या, तरुणांच्या, महिलांच्या आकांक्षांशी सुसंगत वागलो नाही तर आपण लोकशाही, बहुपक्षीयता आणि विश्वासार्हता धोक्यात आणू,” असे ब्राझीलचे अध्यक्ष म्हणाले. त्यांनी पुन्हा एकदा जीवाश्म इंधनाचा मुद्दा उपस्थित केला आणि म्हटले की देशांनी त्यापासून कसे दूर जायचे हे शोधले पाहिजे.
“आपल्याला हरितगृह वायू उत्सर्जन कमी करण्याची गरज आहे. आपल्याला जीवाश्म इंधनाशिवाय कसे जगायचे आणि तो मार्ग कसा तयार करायचा याबद्दल विचार करायला हवा,” असे ते म्हणाले. “मी हे मोकळेपणाने सांगतो कारण मी अशा देशातून आहे जो देश दररोज 5 दशलक्ष बॅरल तेल काढतो. पण असा देश जो पेट्रोलमध्ये मिसळलेले सर्वाधिक इथेनॉल वापरतो, जो भरपूर बायोडिझेल तयार करतो – आणि आपल्या डिझेलमध्ये आधीच 15 टक्के बायोडिझेल मिसळलेले आहे. 87 टक्के स्वच्छ वीज असलेला देश – आणि मला सर्वांसाठी हे हवे आहे.
Recent Comments