सिंगापूर उच्चायुक्तांकडून दिल्लीतील नागरिकांसाठी प्रवास सल्लागार सूचना जारी

फाईल फोटो : दिल्लीतील वायू प्रदूषण.

नवी दिल्ली: सिंगापूर उच्चायुक्तांनी सोमवारी नवी दिल्लीतील आपल्या नागरिकांसाठी एक प्रवास सल्लागार सूचना जारी केली असून, त्यांना वायू प्रदूषणाशी संबंधित अधिकाऱ्यांच्या शिफारसींचे पालन करण्याचे आणि धुक्यामुळे होणाऱ्या विमान  विलंबाची नोंद घेण्याचे आवाहन केले आहे. भारतातील देशाच्या उच्चायुक्तांनी जारी केलेली ही पहिलीच सल्लागार सूचना आहे. त्यात म्हटले आहे की, दिल्ली-एनसीआरमध्ये ग्रेडेड रिस्पॉन्स ॲक्शन प्लॅनचा (ग्रॅप) चौथा टप्पा लागू करण्यात आला आहे. “भारतीय केंद्रीय प्रदूषण नियंत्रण मंडळाने ग्रेडेड रिस्पॉन्स ॲक्शन प्लॅनचा चौथा टप्पा लागू केल्याच्या पार्श्वभूमीवर, सिंगापूर उच्चायुक्तांनी दिल्ली एनसीआरमधील सिंगापूरच्या नागरिकांसाठी खालील सल्लागार सूचना जारी केली आहे,” असे भारतातील सिंगापूरचे उच्चायुक्त सायमन वोंग यांनी ‘एक्स’वरील एका पोस्टमध्ये म्हटले आहे.

या निवेदनात म्हटले आहे की, ग्रॅप-IV अंतर्गत, बांधकाम आणि औद्योगिक कामांवर मोठ्या प्रमाणात निर्बंध घालण्यात आले आहेत आणि शाळा व कार्यालयांना हायब्रीड स्वरूपात काम करण्यास प्रोत्साहित केले जात आहे. “दिल्ली प्रशासनाने रहिवाशांना, विशेषतः लहान मुलांना आणि श्वसन किंवा हृदयविकार असलेल्यांना, घरातच राहण्याचे आणि बाहेर पडताना मास्क वापरण्याचे आवाहन केले आहे. या संदर्भात, उच्चायुक्तालय दिल्ली राष्ट्रीय राजधानी क्षेत्रातील सिंगापूरच्या नागरिकांना या सल्ल्याकडे लक्ष देण्याचे आवाहन करत आहे,” असेही या निवेदनात म्हटले आहे. सोमवारी धुक्यामुळे दिल्लीच्या आयजीआय विमानतळावर अनेक विमानांच्या वाहतुकीत व्यत्यय आला. यावर सिंगापूर उच्चायुक्तांनी म्हटले आहे की, “प्रवाशांनी याची नोंद घ्यावी आणि अद्ययावत माहितीसाठी संबंधित विमान कंपन्यांशी संपर्क साधावा.” एअर इंडिया आणि इंडिगोसह इतर विमान कंपन्यांच्या विमानांवर याचा परिणाम झाला.

सिंगापूर व्यतिरिक्त, भारतातील इंग्लंड आणि कॅनडाच्या दूतावासांनीही दिल्लीतील वायू प्रदूषणाशी संबंधित प्रवास सल्लागार सूचना जारी केल्या आहेत. “गंभीर वायू प्रदूषण हा आरोग्यासाठी एक मोठा धोका आहे, विशेषतः ऑक्टोबर ते फेब्रुवारी या हिवाळ्याच्या महिन्यांत. उत्तर भारतीय शहरे अत्यंत उच्च पातळीच्या प्रदूषणाने सर्वाधिक प्रभावित आहेत. लहान मुले, वृद्ध आणि आधीच आजार असलेल्या व्यक्तींना याचा विशेषतः त्रास होऊ शकतो,” असे इंग्लंडच्या परराष्ट्र, राष्ट्रकुल आणि विकास कार्यालयाने (एफसीडीओ) आपल्या सल्लागार सूचनेत म्हटले होते. त्याचप्रमाणे, कॅनेडियन प्रवास सल्लागार सूचनेत म्हटले होते की, “धूर, प्रदूषित धुके आणि इतर प्रकारचे वायू प्रदूषण शहरी भागात आणि दिल्लीसारख्या शहरांमध्ये अत्यंत धोकादायक असू शकते. हिवाळ्यात ही परिस्थिती सहसा सर्वांत वाईट असते.”

दिल्ली-एनसीआरमधील वायू प्रदूषण ‘गंभीर’ पातळीच्या जवळ पोहोचल्याने शनिवारी ग्रॅप-IV लागू करण्यात आला. रविवारी दिल्लीचा सरासरी वायू गुणवत्ता निर्देशांक (एक्यूआय) 461 होता.