नवी दिल्ली: इंडिया एआय इम्पॅक्ट समिट 2026 दरम्यान काँग्रेसच्या युवा शाखेच्या सदस्यांनी ‘शर्टलेस’ निदर्शने केल्यानंतर काही दिवसांनी ‘काँग्रेसने राष्ट्रीय कार्यक्रमाचे उल्लंघन केल्याचा’ आरोप पंतप्रधान नरेंद्र मोदी यांनी रविवारी केला. “काँग्रेसने एका जागतिक कार्यक्रमाचे रूपांतर त्यांच्या सडक्या आणि विकृत राजकारणाच्या मैदानात केले,” असे मोदी यांनी मेरठ येथे ‘नमो भारत’ ट्रेनला हिरवा झेंडा दाखवल्यानंतर एका जाहीर सभेत सांगितले. “ही शिखर परिषद भाजपचा कार्यक्रम नव्हता. भारतीय युवा काँग्रेस (आयवायसी) कार्यकर्त्यांनी केलेल्या निषेधामुळे राष्ट्रीय कार्यक्रमाची प्रतिष्ठा भंग झाली आहे”. असे प्रतिपादन त्यांनी केले.
“काँग्रेसने हे लक्षात ठेवायला हवे होते, की एआय ग्लोबल समिट हा भाजपचा कार्यक्रम नव्हता, हा देशाचा कार्यक्रम होता. हा देशाच्या सन्मानाचा कार्यक्रम होता. पण काँग्रेसने परवा सर्व शिष्टाचारांना धाब्यावर बसवले. आज, संपूर्ण देशभरात, लोक काँग्रेसच्या धोरणांवर आणि पद्धतींवर थुंकत आहेत. काँग्रेसच्या या भ्रष्ट धोरणाचा संपूर्ण देश निषेध करत आहे,” ते म्हणाले. शुक्रवारी, इंडियन युथ (आयवायसी) च्या सदस्यांनी नवी दिल्लीतील ‘इंडिया एआय इम्पॅक्ट समिट’च्या ठिकाणी ‘शर्टलेस’ निदर्शने केली, त्यांनी मोदी आणि अमेरिकेचे अध्यक्ष डोनाल्ड ट्रम्प यांच्या प्रतिमा असलेले टी-शर्ट हातात धरले आणि सरकार आणि भारत-अमेरिका कराराविरुद्ध घोषणाबाजी केली. त्याच दिवशी नंतर, दिल्ली पोलिसांनी या निदर्शनासंदर्भात चार युवा काँग्रेस कार्यकर्त्यांना अटक केली. या प्रकरणात व्यापक कट रचण्याचा प्रयत्न होता का, याची चौकशी सुरू आहे. मेरठमध्ये बोलताना मोदींनी रविवारी आरोप केला, की “काँग्रेसचे नेतृत्व राजकीय मतभेदापेक्षा वैयक्तिक शत्रुत्वाने प्रेरित आहे. काँग्रेस नेते माझा द्वेष करतात; ते माझी कबर खोदू इच्छितात. ते माझ्या आईचा अपमान करण्यासही मागेपुढे पाहत नाहीत. मला एक गोष्ट समाधान देते, ती म्हणजे दिल्लीतील घटनेत काँग्रेसच्या सर्व मित्रपक्षांनी काँग्रेसवर पूर्णपणे टीका करण्याचे धाडस दाखवले आहे. याबद्दल मी त्यांचे जाहीरपणे आभार मानतो.”
“भारताने एक जागतिक शिखर परिषद यशस्वीरित्या आयोजित केली ज्यामध्ये 80 हून अधिक देशांचे प्रतिनिधी सहभागी झाले होते. एकीकडे, देशवासी भारताच्या विकासासाठी दिवसरात्र कष्ट करत आहेत, परंतु इथेच देशात असे काही राजकीय पक्ष आहेत, जे भारताचे यश पचवू शकत नाहीत. आत्ताच, तुम्ही पाहिले की जगातील सर्वात मोठी एआय इम्पॅक्ट समिट भारतात झाली. जगातील कोणत्याही विकसनशील देशात अशा प्रकारची परिषद यापूर्वी कधीही आयोजित करण्यात आली नव्हती. परंतु काँग्रेस आणि त्यांच्या पर्यावरणाने भारताच्या जागतिक कार्यक्रमाला त्यांच्या नग्न आणि घाणेरड्या राजकारणाचा आखाडा बनवले. कार्यक्रमाच्या ठिकाणी, परदेशी पाहुण्यांसमोर, काँग्रेस कार्यकर्ते कपडे काढून उपस्थित राहिले. मी काँग्रेस नेत्यांना विचारतो: देशाला आधीच माहीत आहे, की तुम्ही नग्न आहात, मग तुमचे कपडे काढण्याची काय गरज होती?”
संसदेच्या अर्थसंकल्पीय अधिवेशनादरम्यान त्यांनी विरोधी पक्षातील महिला खासदारांकडून गोंधळ उडेल, या अपेक्षेने लोकसभेला संबोधित न करण्याचा निर्णय घेतला होता, त्याबद्दल मोदी म्हणाले, “महिला खासदारांना पाठवून आणि त्याद्वारे जागा व्यापून तुम्ही पंतप्रधान होऊ शकत नाही. तुम्ही लोक इतके पोकळ झाले आहात का, की आता तुम्ही यासाठी माता आणि भगिनींना पुढे ढकलत आहात? काँग्रेस देशावर एक ओझे बनली आहे.”
Recent Comments