नवी दिल्ली: राष्ट्रपतींच्या अभिभाषणावरील आभार प्रस्तावाला पंतप्रधान नरेंद्र मोदींनी उत्तर का दिले नाही, यावर स्पष्टीकरण देताना लोकसभा अध्यक्ष ओम बिर्ला यांनी गुरुवारी सांगितले की, ‘देशाच्या लोकशाही परंपरेला बाधा पोहोचवणारी ‘अप्रिय’ घटना घडण्याची भीती असल्याने त्यांनी पंतप्रधानांना त्यांचे प्रथागत भाषण टाळण्याची विनंती केली होती’. पंतप्रधान मोदींनी चर्चेला उत्तर न देताच, लोकसभेने आवाजी मतदानाने राष्ट्रपतींच्या अभिभाषणावरील आभार प्रस्ताव मंजूर केला.
माजी लष्करप्रमुख जनरल एम.एम. नरवणे यांच्या अप्रकाशित आत्मचरित्रातील काही भाग उद्धृत करू इच्छित असल्याने विरोधी पक्षनेते राहुल गांधी यांना भाषण करता आले नाही, त्यानंतर संसदेच्या कनिष्ठ सभागृहाचे कामकाज अनेकदा तहकूब करण्यात आले. भाजप खासदार निशिकांत दुबे यांच्या टिप्पणीनंतर निदर्शने वाढल्याने आठ विरोधी खासदारांनाही निलंबित करण्यात आले. ‘पंतप्रधान घाबरले असल्याने त्यांनी भाषण देण्यापासून माघार घेतल्याचा’ दावा विरोधकांनी केला. दिवसाचे कामकाज तहकूब करण्यापूर्वी, लोकसभा अध्यक्षांनी सांगितले की, विरोधी सदस्य अभूतपूर्व पद्धतीने आंदोलन करण्याची योजना आखत असल्याची निश्चित माहिती मिळाल्यानंतर त्यांनी पंतप्रधान मोदींना सभागृहात न येण्याची विनंती केली होती. ‘बुधवारी सभागृहात काय घडले, हे देशाने पाहिले आहे’, असे ते म्हणाले. “जेव्हा सभागृह नेत्याला राष्ट्रपतींच्या अभिभाषणाला उत्तर द्यायचे होते, तेव्हा मला विश्वसनीय माहिती मिळाली, की काँग्रेस पक्षाचे काही सदस्य पंतप्रधानांच्या आसनाजवळ जाऊन एखादी अप्रिय घटना घडवू शकतात,” असे बिर्ला म्हणाले. “जर ही घटना घडली असती, तर या अत्यंत अप्रिय दृश्याने देशाच्या लोकशाही परंपरांना धक्का बसला असता. हे टाळण्यासाठी, मी पंतप्रधानांना सभागृहात न येण्याची विनंती केली. आणि सभागृहाचा अध्यक्ष म्हणून, सभागृहाच्या उच्च परंपरा आणि प्रतिष्ठा जपण्याची माझी जबाबदारी होती. माझा सल्ला स्वीकारल्याबद्दल मी माननीय पंतप्रधानांचे आभार मानतो,” असे त्यांनी पुढे सांगितले.
नंतर, भाजपचे ज्येष्ठ नेते रविशंकर प्रसाद म्हणाले की, “लोकसभा अध्यक्षांनी आपली खंत व्यक्त केली आहे. भारतीय संसदेच्या इतिहासात असे कधीही घडले नाही, की पंतप्रधानांना घेरून बोलण्यापासून जबरदस्तीने रोखण्यात आले आणि अध्यक्षांना त्यांना न येण्यास सांगावे लागले. विरोधकांनी आणि काँग्रेस सदस्यांनी हे काय केले आणि त्यांना काय साध्य करायचे आहे? संसद हे चर्चेचे ठिकाण आहे; कायद्याच्या मर्यादेत राहून आपली मते मांडा”, ते म्हणाले. काँग्रेसचे प्रवक्ते पवन खेरा म्हणाले की, काँग्रेस पक्ष बुधवारी पंतप्रधानांवर ‘हल्ला’ करण्यासाठी महिला खासदारांचा वापर करण्याची योजना आखत आहे, अशा बातम्या माध्यमांमध्ये पेरल्या जात आहेत. “एखाद्या महिलेने केलेला निषेध म्हणजे दहशतवाद आहे का? मोदी सरकार आणि त्यांचे आज्ञाधारक पत्रकार एका दलित महिला खासदाराच्या उभे राहण्याने अस्वस्थ झाले होते का? ते त्यांना अस्पृश्य मानतात का? मोदी सरकार आणि त्यांच्या चाटूकार पत्रकारांनी देशातील महिलांची, विशेषतः दलित महिलांची माफी मागितली पाहिजे,” असे त्यांनी ‘एक्स’वर पोस्ट केले. बुधवारी, भाजप खासदार मनोज तिवारी यांनी दावा केला की, विरोधी पक्षाच्या अनेक महिला खासदार सभागृहाच्या मध्यभागी आल्या होत्या आणि पंतप्रधानांकडे सरसावल्या होत्या, तसेच वरिष्ठ मंत्र्यांनी वारंवार केलेल्या आवाहन करूनही त्या आपल्या जागेवर परतल्या नाहीत.
“आज जे घडले त्याची छायाचित्रे पाहून तुम्हाला धक्का बसेल… ही परिस्थिती दाखवते की जनता त्यांना (काँग्रेसला) पराभूत करत असल्याने, ते आम्हाला (भाजपला) संसदेत बोलू देणार नाहीत,” असे ते म्हणाले. “देशाने इतका मोठा सन्मान मिळवला आहे, तरीही ते तो साजरा करू देणार नाहीत आणि पंतप्रधान मोदींना बोलण्यापासून रोखण्यासाठी ते हे सर्व करत आहेत. संपूर्ण देश हे सर्व पाहत आहे आणि देश काँग्रेसकडून उत्तर मागेल.” निशिकांत दुबे यांच्या प्रकरणाच्या विपरीत, विरोधी पक्षाचे खासदार अद्याप प्रकाशित न झालेल्या पुस्तलाचा संदर्भ देत होते, असेही ते पुढे म्हणाले.
Recent Comments