नवी दिल्ली: उत्तरप्रदेशातील महाराजगंज जिल्ह्यात भारत-नेपाळ सीमेवरून नेपाळमध्ये जाण्याचा प्रयत्न करणाऱ्या अमेरिकेच्या नौदलातील एका माजी अधिकाऱ्याला सशस्त्र सीमा दलाने (एसएसबी) ताब्यात घेतले. अधिकाऱ्यांच्या म्हणण्यानुसार, अटकेच्या वेळी आरोपीकडे प्रवासाशी किंवा ओळखीशी संबंधित कोणतीही कागदपत्रे नव्हती. पोलिसांच्या माहितीनुसार, हा आरोपी श्रीलंकेतून बेकायदा भारतात आला होता आणि नोव्हेंबर 2025 पासून गोव्यात राहत होता.
11 जुलै रोजी, एसएसबीने भगवानपूर पोलीस चौकीच्या हद्दीतील एका पाऊलवाटेवर, सीमा स्तंभ क्रमांक 516 जवळ एका अमेरिकन नागरिकाला ताब्यात घेतले; त्याने आपली ओळख ‘जॉर्डन ब्राउन’ अशी सांगितली. “ही व्यक्ती अधिकृत परवानगीशिवाय नेपाळमध्ये प्रवेश करण्याचा प्रयत्न करत असताना सोनौली जवळ पकडला गेली. चौकशीदरम्यान तिने आपली ओळख जॉर्डन ब्राउन अशी सांगितली आणि आपण अमेरिकेतील कॅलिफोर्नियाचे रहिवासी असल्याचे सांगितले,” असे अतिरिक्त पोलीस अधीक्षक (महाराजगंज) सिद्धार्थ यांनी सांगितले. सीमेवर थांबण्याचा इशारा मिळताच ब्राउनने तेथून पळून जाण्याचा प्रयत्न केला, परंतु एसएसबीच्या अधिकाऱ्यांनी त्याला अडवले.
चौकशीदरम्यान पोलिसांना समजले की, ब्राउन याने यापूर्वी पर्यटक व्हिसावर थायलंडचा प्रवास केला होता आणि तिथे त्याचा पासपोर्ट हरवला होता. “त्यानंतर तो सागरी मार्गाने श्रीलंकेला गेला आणि तिथून 2 नोव्हेंबर 2025 रोजी सागरी मार्गानेच भारतात दाखल झाला,” असे अतिरिक्त पोलीस अधीक्षकांनी सांगितले. तेव्हापासून हा आरोपी गोव्यात राहत होता. “कोणतीही वैध प्रवास कागदपत्रे किंवा ओळखपत्राचा पुरावा नसताना नेपाळमध्ये प्रवेश करण्याचा प्रयत्न करत असताना त्याला पकडण्यात आले,” असे त्या अधिकाऱ्याने पुढे सांगितले.
आरोपीने पोलिसांना असेही सांगितले की, त्याने 2024 पर्यंत अमेरिकन नौदल आणि ‘फॉरेन सर्व्हिसेस’मध्ये (परराष्ट्रसेवा) काम केले होते. “त्याने सांगितले की ऑक्टोबर 2024 मध्ये त्याने उत्तराखंडमधील एका भारतीय महिलेशी विवाह केला होता. तसेच, गोव्यात असताना भेटलेल्या ‘नाज’ नावाच्या नेपाळी व्यक्तीला भेटण्यासाठी तो नेपाळला जात होता,” असे आणखी एका अधिकाऱ्याने सांगितले. मात्र, या प्रकरणाची माहिती असलेल्या अधिकाऱ्याने सांगितले की, आरोपी वारंवार आपली विधाने बदलत होता.
वैध कागदपत्रांशिवाय भारतात प्रवेश केल्याप्रकरणी पोलिसांनी या परदेशी नागरिकावर ‘इमिग्रेशन अँड फॉरेनर्स ॲक्ट’च्या (स्थलांतर आणि परदेशी नागरिक कायदा) कलम 21 आणि 23 अन्वये गुन्हा दाखल केला आहे. “आम्ही संबंधित दूतावासांना माहिती दिली असून पुढील कायदेशीर कार्यवाही सुरू आहे,” असे त्या अधिकाऱ्याने सांगितले.
Recent Comments