नवी दिल्ली: मणिपूरमध्ये मंगळवारी पुन्हा हिंसाचार उफाळून आला. कांगपोकपी जिल्ह्यातील चम्फाई ब्लॉकमधील एका नागा गावावर सशस्त्र व्यक्तींनी हल्ला केला आणि अनेक घरे जाळून टाकली, अशी माहिती पोलीस अधिकाऱ्यांनी बुधवारी दिली. हल्लेखोरांनी अंदाधुंद गोळीबार केला आणि नऊ निवासी घरे, एक चर्च व इतर मालमत्तांना आग लावली, ज्यामुळे मोठे नुकसान झाले आणि बाधित कुटुंबे विस्थापित झाली, असा आरोप ‘तोकपा नागा व्हिलेज ऑथॉरिटी’ने केला आहे. ही घटना रात्री साधारण साडेनऊ वाजता घडल्याचे त्यांनी सांगितले.
“छद्मावरण करणारे गणवेश (कॅमफ्लाज युनिफॉर्म) परिधान केलेला आणि अत्याधुनिक स्वयंचलित शस्त्रे बाळगलेला सशस्त्र व्यक्तींचा एक गट तोकपा नागा गावात शिरला,” असे त्या संस्थेने म्हटले आहे. स्थानिक रहिवाशांनी शेअर केलेल्या व्हिडिओमध्ये गाव आगीच्या विळख्यात सापडल्याचे दिसून आले. एका वरिष्ठ पोलीस अधिकाऱ्याने सांगितले की, समाजकंटकांनी तुमनाउपोकपी थांगल गावाजवळील तोकपा लियांगमाई नागा गावावर गोळीबार केला आणि त्यानंतर तेथील अनेक घरांना आग लावली. पोलिसांनी दिलेल्या माहितीनुसार, ही घटना मंगळवारी रात्री 10 च्या सुमारास घडली.
“जळून खाक झालेल्या घरांची नेमकी संख्या आम्ही अद्याप निश्चित केलेली नाही आणि या हल्ल्यामागे कोण आहे याचा तपास करत आहोत. या प्रकरणाचा तपास सुरू आहे,” असे त्या अधिकाऱ्याने ‘द प्रिंट’ला सांगितले. तोकपा नागा ग्राम प्राधिकरणाने असाही आरोप केला आहे की, “शेजारच्या गावकऱ्यांनी वेळेवर आवाहन आणि तातडीची विनंती करूनही, अगदी जवळच असलेल्या कालापहार हायस्कूलमध्ये तैनात असलेल्या केंद्रीय राखीव पोलीस दलाच्या जवानांनी आणि कांगपोकपी पोलिसांनी त्वरित प्रतिसाद दिला नाही.” त्यांनी पुढे म्हटले आहे की, “वेळेवर प्रतिसाद न दिल्यामुळे नागरिकांचे प्राण आणि मालमत्तेचे रक्षण करण्याबाबत निष्काळजीपणा आणि कर्तव्यपालनातील कसूर याबद्दल गंभीर चिंता निर्माण झाली आहे. तोकपा नागा ग्राम प्राधिकरण आणि शेजारील नागा गावे शांतता, जातीय सलोखा आणि कायद्याचे राज्य राखण्यासाठी कटिबद्ध आहेत.” या आरोपांबाबत प्रतिक्रिया जाणून घेण्यासाठी ‘द प्रिंट’ने कुकी-झो कौन्सिलचे प्रवक्ते गिन्झा वुअलझोंग यांच्याशी संपर्क साधला आहे. प्रतिक्रिया मिळाल्यास हा अहवाल अद्ययावत केला जाईल.
मंगळवारच्या या हल्ल्याच्या काही दिवस आधी, कांगपोकपी जिल्ह्यातील सदर हिल्स येथील ‘कुकी स्टुडंट्स ऑर्गनायझेशन’ने अशाच एका घटनेचा निषेध केला होता. त्या घटनेत, सोमवारी दुपारी दीडच्या सुमारास कांगपोकपी जिल्ह्यातील कैलेनजांग गावात ‘नॅशनल सोशालिस्ट कौन्सिल ऑफ नागालँडच्या (इसाक-मुइवा-केएसओ) ‘पूर्णपणे स्वयंचलित शस्त्रे असलेल्या संशयित सदस्यांनी’ नागरिकांची घरे जाळली होती. “हे कृत्य शांतता भंग करण्याचा आणि निष्पाप गावकऱ्यांमध्ये भीती पसरवण्याचा थेट प्रयत्न आहे,” असा आरोप केएसओने केला होता.
Recent Comments