नवी दिल्ली: परवेश वर्मा यांच्यावर एका व्यक्तीच्या कानशिलात लगावल्याचा आरोप झाल्यानंतर, दिल्ली पोलिसांनी त्यांच्यावर ‘नॉन-कॉग्निझेबल रिपोर्ट’ (एनसीआर) दाखल केला आहे. तसेच, आम आदमी पक्षाचे (आप) आमदार जरनैल सिंग यांच्याविरुद्धही एक स्वतंत्र गुन्हा दाखल करण्यात आल्याचे सूत्रांनी सांगितले. एका वरिष्ठ पोलीस अधिकाऱ्याने सांगितले की, पश्चिम दिल्लीतील तिलक नगर येथे रस्ते पाहणीदरम्यान 22 वर्षीय तरुणाच्या कानशिलात लगावल्याच्या आरोपावरून सार्वजनिक बांधकाम विभागाचे (पीडब्ल्यूडी) मंत्री वर्मा यांच्या विरोधात एनसीआर दाखल करण्यात आला आहे.
“सार्वजनिक बांधकाम विभागाचे सहाय्यक अभियंता आणि इतर सरकारी कर्मचाऱ्यांना त्यांच्या कर्तव्यपालनात अडथळा आणल्याच्या आरोपावरून जरनैल सिंग यांच्यावर हा गुन्हा दाखल करण्यात आला आहे, असे अधिकाऱ्याने सांगितले. रविवारी तिलक नगरमध्ये रस्त्याच्या पाहणीदरम्यान एका व्यक्तीने व्हिडिओ रेकॉर्ड करण्याचा प्रयत्न केला असता, वर्मा यांनी त्या व्यक्तीच्या कानशिलात लगावली (असा आरोप आहे) आणि ते वादाच्या भोवऱ्यात सापडले. एका व्हिडिओमध्ये दिल्लीचे मंत्री लोकांच्या गराड्यात दिसत आहेत; त्यात ते त्या व्यक्तीच्या हातातील मोबाईल फोन डाव्या हाताने हिसकावून घेताना आणि त्यानंतर कथितरीत्या त्याच्या कानशिलात लगावताना दिसत आहेत.
सिंग यांच्याविरुद्धचा गुन्हा पीडब्ल्यूडीच्या सहाय्यक अभियंत्याच्या तक्रारीवरून दाखल करण्यात आला, तर वर्मा यांच्याविरुद्धची एनसीआर साहिब सिंग या तक्रारदाराच्या तक्रारीवरून ‘भारतीय न्याय संहिता’ कलम 115 (स्वेच्छेने दुखापत करणे) अन्वये दाखल करण्यात आली. पोलीस उपायुक्त (पश्चिम) हरेश्वर स्वामी यांनी एका निवेदनात सांगितले की, सिंग आणि पीडब्ल्यूडीच्या सहाय्यक अभियंत्याच्या तक्रारींवरून कायद्याच्या संबंधित कलमांनुसार कारवाई करण्यात आली आहे. “या घटनेबाबत आणखी काही तक्रारीही प्राप्त झाल्या आहेत, ज्यांचा तपास प्रक्रियेदरम्यान विचार केला जाईल.” त्यांनी सांगितले.
नंतर वर्मा यांनी सोशल मीडियावर एक व्हिडिओ निवेदन जारी केले, ज्यामध्ये त्यांनी रस्त्याच्या पाहणीदरम्यान ‘आप’ कार्यकर्त्यांनी आपल्या कुटुंबाला शिवीगाळ केल्याचा आरोप केला. “जर्नाइल सिंग त्यांच्या कार्यकर्त्यांसह तिथे आले होते ज्यांना आधीच कल्पना देण्यात आली होती, आणि त्यांनी लगेचच उद्धटपणे वागायला सुरुवात केली. त्यांच्या एका कार्यकर्त्याने माझ्या कुटुंबाला शिवीगाळ करण्यास सुरुवात केली,” असा दावा त्यांनी केला. त्यानंतर त्यांनी आणखी एक व्हिडिओ शेअर केला. “विकास कामे करणे हाच माझा एकमेव उद्देश आहे आणि त्यात कोणी अडथळा आणल्यास मी ते खपवून घेणार नाही,” असा दावा त्यांनी केला.
‘आप’चे आमदार जर्नाइल सिंग यांनी वर्मा यांच्या वर्तनाचा निषेध केला. “हे भारताची राजधानी असलेल्या दिल्लीतील भाजप सरकारचे पीडब्ल्यूडी मंत्री आहेत,” असे त्यांनी ‘एक्स’वरील एका पोस्टमध्ये म्हटले. “ते रस्त्याची पाहणी करण्यासाठी आले होते, परंतु एकापाठोपाठ एक घोटाळे उघडकीस येत असल्याचे पाहून त्यांचा संयम सुटला आणि व्हिडिओ रेकॉर्ड करणाऱ्या माझ्या सहकाऱ्याशी त्यांनी गुंडासारखी वर्तणूक केली.”
जर्नाइल सिंग यांनी ‘द प्रिंट’ला सांगितले की, वर्मा यांनी त्यांना रस्त्यांची स्थिती पाहण्यासाठी बोलावले होते. आमदाराने सांगितले की, त्यांना वाटले होते, की मंत्री रस्त्याची पाहणी करतील, दर्जा तपासतील आणि कामाच्या खराब दर्जाबद्दल कदाचित पीडब्ल्यूडी अधिकाऱ्यांवर कारवाई करतील. “जेव्हा त्यांनी मला रस्ता कुठे खराब होत आहे हे दाखवायला सांगितले, तेव्हा मी त्यांना दाखवले, की रस्त्याचा वरचा थर एखाद्या गालीच्याप्रमाणे (कार्पेट) उखडून येत होता; मात्र कोणतीही कारवाई करण्याऐवजी त्यांनी मोबाईल फोन ओढून घेतला, घटनेचे चित्रीकरण करणाऱ्या व्यक्तीच्या कानशिलात लगावली आणि तेथून पळ काढला,” असा आरोप सिंग यांनी केला. साहिब, जे या घटनेतील पीडित आहेत, ते ‘आप’ आमदाराची सोशल मीडिया खाती सांभाळतात.
“या रस्त्याच्या स्थितीची पाहणी करण्यासाठी सार्वजनिक बांधकाम विभागाने आम्हाला बोलावले होते, म्हणून आम्ही इथे आलो होतो. रस्त्याचा पृष्ठभाग कसा उखडून येत होता, हे मी त्यांना दाखवले. ही बाब निदर्शनास आणून दिल्यावर मंत्र्यांना ते सहन झाले नाही. त्यांनी माझ्यावर हात उगारला. तिथे पोलीस कर्मचारी उपस्थित होते आणि हे सर्व त्यांच्याच देखरेखीखाली घडले,” असे सांगत त्यांनी मंत्र्याकडे माफीची मागणी केली.
Recent Comments