ब्रिटिश बँड ‘गोरीलाझ’सोबतचा अल्बम ठरला आशा भोसलेंचा शेवटचा अल्बम

संग्रहित छायाचित्र : आशा भोसले.

आशा भोसले आपल्या शेवटच्या श्वासापर्यंत गायन क्षेत्रातील एक दिग्गज व्यक्तिमत्त्व आणि मार्गदर्शक राहिल्या. ब्रिटिश व्हर्च्युअल बँड ‘गोरिलाझ’सोबतचे त्यांचा शेवटचा संयुक्त प्रकल्प त्यांच्या आयुष्यभराच्या संगीत प्रवासाचा एक समर्पक समारोप ठरतो. गोरिलाझच्या फेब्रुवारी 2026 मधील ‘द माउंटन (पर्वत)’ या अल्बममधील त्यांचे शेवटचे वैशिष्ट्यपूर्ण गाणे, ‘द शॅडोई लाईट’, आता एका भावपूर्ण निरोपासारखे भासते. आयुष्यातील अनेक चढ-उतार अनुभवलेल्या प्रगल्भ गायिकेच्या मनाचे ते प्रतिबिंब वाटते.

या गाण्यात, त्या एका नावाड्यास साद घालतात, पाण्यापलीकडे, अशा ठिकाणी घेऊन जाण्याची विनंती करतात, जिथे सुख-दुःख, विजय-पराजय काहीही नाही, आणि जिथे खरे प्रेम त्याच्या शुद्धतम स्वरूपात अस्तित्वात असते. ” इफ इट्स गॉड यू ट्रस्ट, व्हॉट विल दे प्रॉमिस यू व्हेन युअर व्हॉइस इज लॉस्ट?” या मन हेलावून टाकणाऱ्या ओळी, आपण सर्वजण अनुभवत असलेल्या क्षणभंगुरता व नश्वरतेबद्दल बोलतात. जेव्हा त्यांचा आवाज, जी त्यांची ओळख आहे, तो निघून जातो, तेव्हा काय उरते, याचे हे एक स्पष्ट प्रतिबिंब आहे. तरीही, ‘शेवट हीच सुरुवात आहे’ या वाक्यात स्वीकृतीचे वजन आहे, जणू काही त्यांना आपला प्रवास जवळ येत असल्याची जाणीव झाली होती.

‘हटके’ आवाज

गायनक्षेत्रात आशा भोसले कायमच अग्रणी राहिल्या. वयाच्या नव्वदीतही त्या प्रसिद्धीच्या झोतात होत्या. 2023 मध्ये, त्यांनी दुबईच्या कोका-कोला एरिनामध्ये मुख्य सादरीकरण करून आपला 90 वा वाढदिवस साजरा केला. 2024 मध्ये, 9 मार्च रोजी मुंबईच्या जिओ वर्ल्ड गार्डनमध्ये झालेला ‘आशा@90’ हा संगीत कार्यक्रम त्यांच्या जीवन आणि संगीताचा एक ऐतिहासिक सोहळा ठरला. त्याचवर्षी डिसेंबरमध्ये, त्या सोनू निगमसोबत एका मोठ्या सादरीकरणासाठी कोका-कोला एरिनामध्ये परतल्या. आठ दशकांमध्ये 12 हजारहून अधिक गाणी रेकॉर्ड केलेल्या आशा भोसले यांची कारकीर्द कोणत्याही विशिष्ट वर्गात बसवता येत नाही. भावपूर्ण गझलांपासून ते ‘दम मारो दम’ सारख्या जोशपूर्ण पॉप गीतांपर्यंत, त्यांनी स्वतःला सतत नव्याने घडवले. परंपरेच्या बंधनात अडकण्यास त्यांनी नकार दिला आणि प्रयोगशीलता व नव्या जागतिक प्रवाहांचा मोकळेपणाने स्वीकार केला.

त्यांच्या संयुक्त प्रकल्पांमधून त्यांचा शोधक-साहसी स्वभाव दिसून येतो. 1991 मध्ये, त्यांनी ब्रिटिश कलाकार बॉय जॉर्ज यांच्यासोबत ‘बो डाऊन मिस्टर’ या गाण्यासाठी एकत्र काम केले, ज्यात त्यांनी इंडो-वेस्टर्न संगीताचा सुरेख मिलाफ साधला होता. 2006 मध्ये, आयसीसी चॅम्पियन्स ट्रॉफीसाठी ऑस्ट्रेलियन क्रिकेटपटू ब्रेट ली यांच्यासोबत ‘यू आर द वन फॉर मी’ या गाण्यात सहयोग करून त्यांनी पुन्हा एकदा आपले अष्टपैलू व्यक्तिमत्त्व जगासमोर आणले. संगीत हा त्यांच्या आयुष्याचा मार्ग होता. त्याने त्यांना अनेक दशके, संस्कृती आणि सीमा ओलांडून प्रसिद्धी मिळवून दिली.

आशा भोसले यांचा आवाज कदाचित शांततेत विलीन होईल, पण त्याचा प्रतिध्वनी कालातीत राहील.