नवी दिल्ली: पश्चिम आशियामध्ये शस्त्रसंधीच्या विस्तारासाठी तीव्र वाटाघाटी सुरू असताना, पाकिस्तानचे संरक्षण प्रमुख फील्ड मार्शल असिम मुनीर तेहरानच्या दौऱ्यानंतर शुक्रवारी वॉशिंग्टनला जाण्याची शक्यता आहे, असे वृत्त ‘अल जझीरा’ने दिले आहे. गेल्या आठवड्यात इस्लामाबादमध्ये अमेरिका आणि इराण यांच्यातील चर्चा निष्फळ ठरली, जी 47 वर्षांतील दोन्ही देशांमधील पहिली उच्चस्तरीय चर्चा होती. वॉशिंग्टनमधील मुनीर यांचे वेळापत्रक अनिश्चित असून, अमेरिकेचे अध्यक्ष डोनाल्ड ट्रम्प यांच्यासोबतच्या भेटीची पुष्टी झालेली नाही.
गेल्या आठवड्याच्या अखेरीस इस्लामाबादमध्ये झालेल्या अनिर्णित चर्चेनंतर या आठवड्यात वाटाघाटी पुन्हा सुरू होऊ शकतात, असे संकेत डोनाल्ड ट्रम्प यांनी दिल्यानंतर, फील्ड मार्शल असिम मुनीर यांचा समावेश असलेले एक पाकिस्तानी शिष्टमंडळ त्यांचा एक नवीन संदेश घेऊन तेहरानमध्ये दाखल झाले. इराणी माध्यमांतील वृत्तानुसार, चर्चेची माहिती असलेल्या अधिकाऱ्यांनी सांगितले की, असिम मुनीर यांच्या दौऱ्यामुळे काही मतभेद कमी होण्यास मदत झाली असली तरी, महत्त्वपूर्ण अडथळे अजूनही कायम आहेत. एका वरिष्ठ इराणी अधिकाऱ्याच्या मते, पाकिस्तानी मध्यस्थीखाली इराणी आणि अमेरिकन वाटाघाटीकारांनी एका व्यापक कराराच्या दिशेने मर्यादित प्रगती केली आहे. परंतु दोन आठवड्यांच्या शस्त्रसंधीपैकी अर्ध्याहून अधिक काळ उलटून गेल्याने, विशेषतः तेहरानच्या अणुकार्यक्रमावरून असलेले मुख्य वाद कायम आहेत. “पाकिस्तानी लष्करप्रमुखांचा तेहरान दौरा काही क्षेत्रांतील मतभेद कमी करण्यासाठी प्रभावी ठरला,” असे एका अधिकाऱ्याने नाव न सांगण्याच्या अटीवर अल जझीराला सांगितले. “परंतु अणुक्षेत्रात अजूनही मूलभूत मतभेद कायम आहेत.” असेही ते म्हणाले.
सर्वांत वादग्रस्त मुद्द्यांपैकी एक म्हणजे इराणच्या उच्च-समृद्ध युरेनियमच्या साठ्याचे भवितव्य आणि कोणत्याही अणुनिर्बंधांचा कालावधी. त्या अधिकाऱ्याने पुढे सांगितले की, ‘शस्त्रसंधी वाढवली जाईल आणि चर्चेची दुसरी फेरी बोलावली जाईल, असा आशावाद वाढत आहे’. पाकिस्तानने गेल्या आठवड्यात इस्लामाबादमध्ये वाटाघाटींच्या पहिल्या फेरीचे आयोजन केले होते, जिथे दोन्ही बाजूंचे प्रतिनिधी 21 तास भेटले, परंतु कोणताही तोडगा निघू शकला नाही. पाकिस्तानच्या परराष्ट्र मंत्रालयाच्या प्रवक्त्याने गुरुवारी सांगितले की, पुन्हा चर्चा सुरू करण्याची कोणतीही तारीख अद्याप निश्चित झालेली नाही. व्हाइट हाऊसने संवाद कायम ठेवण्यात पाकिस्तानने मध्यवर्ती भूमिका बजावल्याचे श्रेय दिले आहे. व्हाइट हाऊसच्या प्रेस सेक्रेटरी कॅरोलाइन लिव्हिट यांनी पाकिस्तानला ‘प्रभावी मध्यस्थ’ असे संबोधले आणि सांगितले की, करार घडवून आणण्यासाठी वॉशिंग्टन हा मार्ग वापरणे सुरू ठेवणार आहे.
त्याच वेळी, अमेरिकेने शस्त्रसंधी वाढवण्याची मागणी केल्याच्या वृत्तांना लिव्हिट यांनी फेटाळून लावले. “सध्या तरी ते खरे नाही. परंतु वाटाघाटी फलदायी होत आहेत”. असे ते म्हणाले. मंगळवारी फॉक्स न्यूजला दिलेल्या मुलाखतीत ट्रम्प यांनी सुचवले की, काही दिवसांच्या आतच पुन्हा एकदा इस्लामाबादमध्ये अधिक चर्चा होऊ शकते.
Recent Comments