नवी दिल्ली: चीनचे परराष्ट्रमंत्री वांग यी हे 22 ते 23 जून दरम्यान देशाची राजधानी दिल्लीत होणाऱ्या ‘ब्रिक्स’ देशांच्या राष्ट्रीय सुरक्षा सल्लागारांच्या (एनएसए) बैठकीला उपस्थित राहणार आहेत, अशी घोषणा बीजिंगने आज, गुरुवारी केली.
“भारताचे राष्ट्रीय सुरक्षा सल्लागार (एनएसए) अजित डोवाल यांच्या निमंत्रणावरून, ‘सीपीसी’ मध्यवर्ती समितीच्या राजकीय ब्युरोचे सदस्य आणि ‘सेंट्रल कमिशन फॉर फॉरेन अफेअर्स’च्या कार्यालयाचे संचालक वांग यी हे 22 ते 23 जून दरम्यान भारतात होणाऱ्या ‘ब्रिक्स’ राष्ट्रीय सुरक्षा सल्लागार आणि राष्ट्रीय सुरक्षेसाठीच्या उच्च प्रतिनिधींच्या 16 व्या बैठकीला उपस्थित राहतील,” असे चीनच्या परराष्ट्र मंत्रालयाच्या प्रवक्त्याने ‘एक्स’ या सोशल मीडिया प्लॅटफॉर्मवर एका निवेदनात म्हटले आहे. जवळपास वर्षभरातील वांग यांची ही पहिलीच भारत भेट असेल. यापूर्वी गेल्या वर्षी ऑगस्टमध्ये त्यांनी राजधानीला भेट दिली होती आणि भारतीय राष्ट्रीय सुरक्षा सल्लागार अजित डोवाल तसेच परराष्ट्रमंत्री एस. जयशंकर यांच्याशी चर्चा केली होती. गेल्या महिन्यात ‘ब्रिक्स’ परराष्ट्र मंत्र्यांच्या बैठकीसाठी चीनचे परराष्ट्र मंत्री नवी दिल्लीला आले नव्हते, कारण 13 ते 15 मे दरम्यान अमेरिकेचे राष्ट्राध्यक्ष डोनाल्ड ट्रम्प बीजिंगच्या दौऱ्यावर होते.
वांग यांची ही भारत भेट अशा वेळी होत आहे जेव्हा दोन्ही देश संबंध स्थिर करण्यासाठी ‘विश्वास निर्माण करणारे उपाय’ राबवत आहेत. 2020 च्या उन्हाळ्यात गलवान येथे झालेल्या संघर्षानंतर भारत आणि चीनमधील संबंधांमध्ये मोठी घसरण झाली होती आणि दोन्ही बाजूंमध्ये उच्च-स्तरीय राजकीय संवाद नगण्य झाला होता. 2024 च्या उन्हाळ्यात जयशंकर आणि वांग यांची काही वेळा भेट झाली आणि त्यानंतर 21 ऑक्टोबर 2024 रोजी सैन्य माघारीचा करार होऊन त्याची घोषणा करण्यात आली; त्यानंतरच नवी दिल्ली आणि बीजिंगने संबंध स्थिर करण्याची प्रक्रिया सुरू केली. ऑक्टोबर 2024 मध्ये रशियातील कझान शहरात झालेल्या ‘ब्रिक्स’ शिखर परिषदेदरम्यान मोदींची भेट चीनचे राष्ट्राध्यक्ष शी जिनपिंग यांच्याशी झाली. दोन्ही नेत्यांनी आपापल्या सरकारांना विविध द्विपक्षीय यंत्रणा कार्यान्वित करण्याचे निर्देश दिले. डिसेंबर 2024 च्या अखेरीस डोवाल बीजिंगला गेले आणि त्यांनी सीमा प्रश्नावर वांग यांच्याशी (दोघेही आपापल्या सरकारचे ‘विशेष प्रतिनिधी’ आहेत) चर्चेची एक फेरी पूर्ण केली.
ऑगस्ट 2025 मध्ये वांग यांच्या भारत भेटीदरम्यान दोन्ही देशांमध्ये ‘विशेष प्रतिनिधी’ यंत्रणेची पुढील फेरी पार पडली. त्यानंतर, भारत आणि चीनने लोका-लोकांमधील संपर्क वाढवण्यासाठी कैलास मानसरोवर यात्रा पुन्हा सुरू करणे आणि थेट प्रवासी विमानसेवा सुरू करणे यांसारखे उपाय अंमलात आणले आहेत. गेल्यावर्षी शांघाय सहकार्य संघटनेच्या (एससीओ) राष्ट्रप्रमुखांच्या शिखर परिषदेदरम्यान तियानजिन येथे मोदी आणि शी यांची भेट झाली होती. 2024 पासून या दोघांमधील ही दुसरी भेट होती. या वर्षाच्या उत्तरार्धात किर्गिस्तानमध्ये होणाऱ्या एससीओ राष्ट्रप्रमुखांच्या शिखर परिषदेलाही हे दोन्ही नेते उपस्थित राहण्याची शक्यता आहे. पुढील आठवड्यात नवी दिल्लीला भेट देणार असताना वांग हे डोवाल आणि जयशंकर या दोघांशीही द्विपक्षीय चर्चा करण्याची शक्यता आहे.
भारत सध्या ‘ब्रिक्स’ या गटाचे अध्यक्षपद भूषवत आहे; या ११ सदस्यांच्या गटात ब्राझील, रशिया, चीन, दक्षिण आफ्रिका, इजिप्त, इथिओपिया, संयुक्त अरब अमिराती, इराण, इंडोनेशिया आणि सौदी अरेबिया यांचा समावेश आहे.
Recent Comments