चेन्नई: सी. जोसेफ विजय यांनी तामिळनाडूचे मुख्यमंत्री म्हणून शपथ घेऊन जेमतेम पंधरवड्याचा कालावधी लोटला असतानाच, विरोधकांनी त्यांच्यावर जोरदार टीकास्त्र सोडले आहे. राज्यात घडलेल्या अनेक भीषण घटनांच्या मालिकेनंतर, विशेषतः 10 वर्षीय मुलीवर झालेला कथित लैंगिक अत्याचार आणि तिची हत्या यांसारख्या घटनांमुळे राज्यातील कायदा व सुव्यवस्था ढासळली असल्याचा आरोप विरोधक करत आहेत.
कोइम्बतूरच्या सुलूर येथे गेल्या गुरुवारी 10 वर्षीय मुलीच्या बाबतीत घडलेल्या घटनेनंतर, विल्लुपुरम येथील 11 वर्षीय मुलीवरही कथित लैंगिक अत्याचार झाल्याची घटना समोर आली. आणखी एका धक्कादायक घटनेत, सोमवारी मदुराई येथील 17 वर्षीय मुलाची निर्घृण हत्या करण्यात आली. या टीकेला प्रत्युत्तर देताना महसूल मंत्री के.ए. सेंगोत्तैयन म्हणाले की, “दीर्घकाळापासून प्रलंबित असलेले प्रश्न एका रात्रीत सुटू शकत नाहीत. मंत्र्यांनी नुकताच पदभार स्वीकारला आहे. दशकांपासून रेंगाळलेले प्रश्न एका रात्रीत नाहीसे होतील, अशी अपेक्षा करणे अन्यायकारक आणि अवास्तव आहे.” दरम्यान, वाढत्या टीकेच्या पार्श्वभूमीवर मुख्यमंत्री विजय यांनी सोमवारी वरिष्ठ पोलीस अधिकाऱ्यांसोबत बैठक घेतली. सरकारच्या अधिकृत निवेदनानुसार, महिला आणि मुलांवरील गुन्ह्यांच्या बाबतीत कठोर कारवाई करण्याचे निर्देश देण्यात आले आहेत.
या निर्देशामध्ये लैंगिक अत्याचारांच्या घटनांबाबत जलद तपास आणि ‘लैंगिक गुन्ह्यांपासून मुलांचे संरक्षण कायदा’ (पॉक्सो) सह संबंधित कायद्यांनुसार कठोर कारवाई करण्याची मागणी करण्यात आली आहे. विजय यांनी अशा घटनांबाबत ‘शून्य सहनशीलता’ धोरण बाळगण्याची ग्वाही दिली. तसेच, अशा घटनांची पुनरावृत्ती रोखण्यासाठी आणि पीडितांना त्वरित न्याय मिळवून देण्यासाठी जिल्हा अधिकाऱ्यांमध्ये अधिक चांगला समन्वय असण्यावर, तसेच महिला व मुलांच्या सुरक्षेसाठी उपाययोजना अधिक बळकट करण्यावर त्यांनी भर दिला. विशेष म्हणजे, द्रमुक (डीएमके) सरकारच्या काळात ‘ढासळलेला कायदा व सुव्यवस्था’ हा विजय यांच्या प्रमुख निवडणूक मुद्द्यांपैकी एक होता.
गुन्हे आणि पोलिसांची कारवाई:
पोलिसांनी या तिन्ही प्रकरणांचा तपास सुरू केला असून, काही संशयितांना अटकही केली आहे. कोइम्बतूर येथील प्रकरणात गेल्या आठवड्यात दोन जणांना अटक करण्यात आली होती. विल्लुपुरम येथील प्रकरणात, कोट्टाकुप्पम येथील ‘सर्व-महिला पोलीस ठाण्या’च्या पोलिसांनी 62 वर्षीय सुतार एन. कन्नियप्पन याला अटक केली आहे. मारक्कनमजवळ, शनिवारी पाचवीत शिकणाऱ्या 11 वर्षीय मुलीवर कथित लैंगिक अत्याचार केल्याचा त्याच्यावर आरोप आहे.
आरोपीने त्या मुलीला ‘वडा’ विकत घेऊन देण्याचे आमिष दाखवून आपल्याकडे बोलावले आणि त्यानंतर तिच्याशी कथितरित्या अयोग्य वर्तन (लैंगिक स्पर्श) केले, असे पोलिसांनी सांगितले आहे. मुलीच्या आईने दाखल केलेल्या तक्रारीच्या आधारे ‘पॉक्सो’अंतर्गत गुन्हा दाखल करण्यात आला आणि आरोपीला न्यायालयीन कोठडीत रवानगी करण्यात आली. मदुराई येथील घटनेत, मीनाक्षी अम्मन मंदिराच्या जवळच असलेल्या आणि मदुराई महापालिकेद्वारे व्यवस्थापित केल्या जाणाऱ्या एका पार्किंग क्षेत्राजवळ, 17 वर्षीय मुलाची पाच जणांच्या टोळीने निर्घृणपणे हत्या केल्याचा आरोप आहे. हा मुलगा झोपलेला असताना, विळे (सिकल) यांसारखी शस्त्रे बाळगणाऱ्या पाच जणांच्या टोळीने त्याच्यावर हल्ला केल्याचे सांगितले जात आहे. या पाचही हल्लेखोरांना अटक करण्यात आली असून, त्यापैकी एकाची ओळख ‘मुथुमणी’ अशी पटली आहे. पोलिसांच्या सूत्रांनी दिलेल्या माहितीनुसार, अलीकडेच पार पडलेल्या मंदिराच्या उत्सवादरम्यान झालेल्या एका वादामुळे निर्माण झालेल्या जुन्या वैमनस्यातूनच ही हत्या घडली असावी, असा संशय त्यांना आहे. मृत मुलावर यापूर्वीच अनेक गुन्हेगारी खटले प्रलंबित असल्याची माहिती समोर आली आहे.
नवीन सरकारवर टीकेची झोड
या तीन घटनांमुळे राजकीय वर्तुळात तीव्र प्रतिक्रिया उमटल्या आहेत. विरोधी पक्षांनी ‘विजय’ यांच्या नेतृत्वाखालील सरकारला, कायदा व सुव्यवस्थेबाबत निवडणुकीच्या प्रचारादरम्यान दिलेल्या आश्वासनांची पूर्तता करण्याची क्षमता या सरकारमध्ये आहे का, असा प्रश्न विचारला आहे. विशेष म्हणजे, याच कायदा व सुव्यवस्थेच्या मुद्द्यांवरून ‘टीव्हीके’ पक्षाने यापूर्वीच्या द्रमुक सरकारवर जोरदार टीका केली होती. द्रमुक नेत्या कनिमोझी यांनी म्हटले आहे की, मदुराई येथील मीनाक्षी अम्मन मंदिराच्या परिसरात एका मुलाची निर्घृण हत्या झाल्याची बातमी अत्यंत धक्कादायक आहे.
“तामिळनाडूची अवस्था अशी झाली आहे की, जिथे दररोज सकाळी अशा प्रकारच्या बातम्या कानावर पडतात, ही बाब अत्यंत वेदनादायी आहे. तामिळनाडू हे आता असे राज्य बनले आहे, जिथे लहान मुले, महिला, दिव्यांग व्यक्ती किंवा वृद्ध नागरिक, कोणीही सुरक्षित नाही. कायदा व सुव्यवस्थेची स्थिती अत्यंत खालावली आहे, याची जाणीव या नवीन सरकारला आहे का?” असा प्रश्न कनिमोझी यांनी ‘एक्स’वर (पूर्वीचे ट्विटर) उपस्थित केला आहे. कोइम्बतूर येथील लैंगिक अत्याचाराच्या घटनेनंतरही कायदा व सुव्यवस्थेच्या मुद्द्यांवरून सरकारच्या गांभीर्यावर प्रश्नचिन्ह उपस्थित करणारे अण्णाद्रमुक नेते एडप्पाडी के. पलानीस्वामी यांनी पुन्हा एकदा ‘टीव्हीके’ सरकारवर जोरदार टीका केली आहे. “महिलांची सुरक्षा धोक्यात आणण्याच्या बाबतीत हे सध्याचे सरकार म्हणजे दुसरे द्रमुक सरकारच आहे का? तामिळनाडूमध्ये महिला आणि मुलींसाठी सुरक्षा नेमकी कुठे उरली आहे?” असा सवाल त्यांनी केला. ईपीएस यांनी मुख्यमंत्री विजय यांना त्यांच्या निवडणुकीच्या आश्वासनांची आठवण करून दिली आणि याप्रकरणी कठोर कारवाई करण्याची मागणी केली.
भाजपचे प्रदेशाध्यक्ष नैनार नागेंद्रन यांनी मदुराई येथील हत्याकांडाचा, तसेच राज्यात वाढत्या गुन्हेगारीचा तीव्र शब्दांत निषेध केला. “महिला आणि मुलांवरील हत्या आणि गुन्हेगारीच्या वृत्तांमुळे तामिळनाडूतील लोक आता प्रत्येक दिवसाची सुरुवात भीतीने करत आहेत. मागील डीएमके सरकारविरोधात सरकारने ज्या कायदा आणि सुव्यवस्थेच्या समस्या उपस्थित केल्या होत्या, त्याच समस्या सोडवण्यात सरकार अपयशी ठरले आहे. केवळ सरकार बदलले आहे, पण लोकांचे हाल सुरूच आहेत,” असे ते म्हणाले. ‘प्रशासन कारवाई करेपर्यंत आणखी किती जीव जातील’?, असा प्रश्न त्यांनी विचारला. माजी प्रदेशाध्यक्ष के. अण्णामलाई यांच्यासह भाजप नेत्यांनी विजय सरकारला ‘उत्सव साजरा करण्याच्या मनस्थितीतून बाहेर पडून जमिनीवरील वास्तवाकडे लक्ष देण्याचे आवाहन’ केले.
दरम्यान, महसूल मंत्री सेंगोत्तैयन म्हणाले की, “मुख्यमंत्री दररोज निवेदने देण्यावर विश्वास ठेवत नाहीत. ते योग्य वेळी निश्चितपणे माध्यमांना भेटतील.” कोइम्बतूर प्रकरणातील तातडीच्या कारवाईवर त्यांनी भर दिला; तसेच, तपासावर देखरेख ठेवण्याचे निर्देश पोलीस महासंचालकांना (डीजीपी) देण्यात आले आहेत. “मुख्यमंत्री सी. जोसेफ विजय यांनी पोलीस महासंचालकांना घटनास्थळी भेट देऊन तपासावर देखरेख ठेवण्याचे निर्देश दिले होते. इतर पुढील कायदेशीर कार्यवाहीही गांभीर्याने पार पाडली जात आहे,” असे सेंगोत्तैयन म्हणाले.
Recent Comments